قصر وبنت جميلة وعربية بورش
( يبقى كده الدنيا ضحكتلي )
قالوا مره لواحد هندخلك القصر ده وليك كل الي فيه من فلوس ودهب وكل شيء فيه هو ملكك خد منه كل الي انت عايزه والي يكفيك ... ولكن ليك وقت معين عشان تخلص لم الفلوس والذهب
فقال الرجل افتحوا لي بس انتم القصر ومحدش ليه دعوه بالباقي فقالوا ليه خلي بالك ان الوقت محدد وقليل فمضيعش وقتك وادخل علي طول علي الفلوس
قال ليهم محدش يوصيني الواحد تعب من الفقر واكيد مش هضيع كنز زي ده ...
ففتحوا له الباب فلما دخل لقى قصر ضخم جدا ً من جوا فيه ذهب وفلوس تزغلل عين التخين .. فجري الرجل بسرعه عشان يلم الفلوس
فشاف علي الحيطه متعلق صوره جميله لقصر كبير جدا وليها حديقه جميله جدا فقال يا سلام هي دي العيشه مش عشة الفراخ الي انا ساكن فيها ... بكنزي هشتري زي القصر ده وأجمل منه عشان اعيش بقا واشوف الدنيا بس قال ناقص حاجه تانيه
فبص بعينه لتحت فوجد صورة بنت مفيش بعد كده حاجه زي الكتاب ما بيقول ... جميله جدا جدا فقال ايوا كده ولو واحده زي ده مع القصر تبقى الدنيا ضحكتلي .. لما اخرج بكنزي هتزوج زيها وقال ناقص حاجه تانيه ..
بص تحت الصوره بتاعة البنت لقى صورة عربيه بورش تحفه قال يا سلام كده البليه لعبت معايه اركب الحته دي واتجوز الحته دي واسكن في القصر ده ... وبعد كده جري عشان ياخد الكنز والفلوس ...
فاتفتح الباب وشالوه وحدفوه برا وقالو ليه الوقت خلص يا معلم ... قال ليهم وهو بيصرخ لاء لاء لاء انا لسا ملمتش حاجه انتوا ضحكتوا عليا قالوا ليه إحنا حذرناك بس انت الي فضلت تدلع وتبص علي الصور قال ليهم طيب نجرب مره تانيه ومش هعمل كده تاني ومش هبص علي الصور والله .. قالوا ليه فات الاوان ... وجه دور غيرك ...
بصراحه يا جماعه الي حكيته ده كله محصلش بس دي مجرد قصه ولكنها بتحصل مع كل شاب مننا بشكل مختلف وبتحصل كده ..:
ربنا يا جماعه جابنا في الارض هنا عشان نجمع من الكنوز والحسنات الي ندخل بيه الجنه ونتمتع فيها
وحذرنا ربنا من أشياء كتيره ولكننا نسينا التحذيرات دي ....
وتمتعنا بالصور زي ما صاحب القصه اتمتع بالصور وترك الكنوز
احنا كمان نسينا الكنوز وعجبتنا البنات البايظه وافتكرنا ان البنات دي حلوه وكويسه يا جماعه دي مجرد صور ربنا حذرنا منها فمتشغلش نفسك بيهم وكبر دماغك منهم وجمع الكنوز الي ربنا امرك بيها
وافتكر ناس تانيه ان القصور في الدنيا دي قصور وانشغل بيها بردو دي صور شغلنا نفسنا بيها
وافتكر ناس تانيه أن متع الدنيا كلها حقيقه لا والله دي صور
بس الفرق بينا وبين صاحب القصه أنه إتحرم من الفلوس بس ومشي ومحدش عاقبه
لكن في الحقيقه وفي علاقتنا مع ربنا الي مش هيدخل الجنه أكيد مش هيقف برا للاسف ليه مكان تاني هيروحه للاسف ( النار )
فعشان كده يا جماعه لازم نعرف ايه الي يرضي ربنا ونعمله ونقرب لله ونعرف ايه الي بيغضب ربنا ونبعد عنه ومحدش يجري ورا الدنيا لانها في الاخر صور ...
وعشان محدش يزعل مني ... هديك كنز قبل ما امشي ولو عجبكم هبعت ليكم كل يوم او يومين كنز جديد من كنوز الدنيا الحقيقه الي ربنا امرنا بيها ..
وإليك بعض الكنوز
بعض كنوز الدنيا الحقيقه
قال رسول الله يا ابا موسى
" هل ادلك علي كنز من كنوز الجنة .. فقلت وما هو ..
قال النبي صلي الله عليه وسلم
" لا حول ولا قوة الا بالله كنز من كنوز الجنة "
أديك عرفت كنز اهو هتقوله ... ولا هتتفرج علي الصور ؟؟
السبت 05 سبتمبر 2020, 5:45 pm من طرف 
